SERMON JAMITA TU MINGGGU INVOKAVIT
17 PEBRUARI 2013 DI HKBP RESSORT BALIMBINGAN
EV. MATEUS 4 : 1 – 11 EP. 5 Musa 6 : 10-191.PATUJOLO
Asa ingkon tangkas do guruhononta songon dia do rumang ni parpuasaon napinatupa ni Jesus asa boi tapatupa parpuasaon na sintong songon nabinahen ni Jesus i. Adong 2 gombaran ni parpuasaon na sintong na boi idaonta di buku nabadia i, jala marhite parpuasaon na sintong i gabe boi unduk ngolu pardagingonta i mangoloi Tondi Parbadia i. Di 2 Kor. 6: 4-5 didok Ap. Paulus : Di na saluhut hupatuduhon hami dirinami songon angka naposo ni Debata: Di bagasan habengeton godang, di bagasan angka haporsuhon, hasusaan dohot hagogotan; 6:5 di na hona pungkul, di na tarhurung, di bagasan hagunturon, di halojaon, di mangkar ni mata, di parpuasaon; songon i do nang di 1 Kor. 4: 11 didok : Ro di na sangombas on, rapar hami jala mauas, marsaemara jala digosagosa do hami, so maringanan na hot. Asa na naeng dohonon ni Jesus di turpuk on mangajari hita do i paboa saleleng di halongonan portibion hita, molo masa ma nahurangan sipanganon, molo masa hapogoson tu hita, ingkon dao ma ungut ungut sian hita. Ingkon benget do hita sahat tu tingki nabinuhul ni Debata manguba na masa i jala sahat tu na dapotan sipanganon na singkopmuse.
2. HATORANGAN NI TURPUK:
A. Mansai arga do lapatan ni parpuasaon ni Tuhan Jesus di hita, ai diok do : Dungi ditogihon Tondi ima Jesus i tu halongonan... ditogihon tu halongonan i asa marpuasa jala asa diunjuni. Asa ndada sangkap manang aturan ni hajolmaon, tung natinogihon ni Tondi i do. Asa ingkon tinogihon ni Tondi i do halak na rajumon na marpuasa na sintong, asing sian i tindakan na so marlapatan do i na manghorhon parmaraan manang gabe madabu tu pangunjunan. Asa ndada na tajalo/manang talului pangunjunan i. Tung tangkas do didok turpuk on : ditogihon Tondi i ma Ibana tu halongonan; ndada inisiatifNa sandiri. Di Rom 8: 4 didok do: “Ai nasa na tinogihon ni Tondi ni Debata, angka i do anak ni Debata”. Asa gabe pangajaran dohot pangunoguon do parpuasaon napinatupa ni Tuhan i. Diajari do hita asa taboto songon dia do Kristus i manghobasi dohot mangurupi hita marhite parpuasaonNa, haraparonNa, pangunjunanna sahat tu hamonanganNa. Asa nasa naporsea di Ibana na so tupa marungkil molo pe hurangan sipanganon, jala na so tupa marjea hita alani pangunjunan ala naung dihamonanghon Tuhan Jesus do saluhutna i, songon na nidokna di Joh 16: 33 : Asa mardame hamu di bagasan Ahu, umbahen na huhatahon angka i tu hamu. Haporsuhon do jambarmuna di portibi on; alai pos ma rohamuna: Nunga talu hubahen portibi on. Laos panogunoguon/sipaingot do turpuk on asa hita pe marlas ni roha ma manghirim di sitaonon dohot pangunjunan i di namngoloi parsuruon ni Debata songon i nang dinapatupa na denggan tu dongan jolma pe. Marhoaso do Barita Na Uli laho pangapuli jalamarhuaso mangalo hajahaton na boi ro ala ni siubeon i, songon di na manungguli dohot margogoihon hita pe di pangunjunan i as unang be mangholsohon na ringkot dipardagingon, alai pos do rohanta na lehononna do sipanganon siganup ari di hita. .
B. Pangunjunan ni Jesus : Rumang ni inganan pangunjunan i dohot hamonangan ni Jesus mansai tangkas do digombarhon.
I. Didok ditogihon do Ibana tu halongonan, dipasombu holan sahalakNa. Tontu songon tandiang na so hapuloan do Jesus i di inganan i, lungun, hansit jala dangol. Soada dongan, soada na boi mangurupi, soada pangapuli, sandok holan Ibana do mangadopi sitaonon i. Disi do dapot parsiajaran na sintong, disi do boi tandaonta dirinta, botoonta ma hinagale ni haporseaonta, jala ringkot na i hape haporseaon na togu i, hape sai bangkol do jolma i mangargahon haporseaon i. Molo singkop hape sipanganon, parabiton, jala sai torop dongan; ndang tandaon ni halak sisongon i pangunjunan i. Ro do pangunjuni i jala dialo do Jesus i, diboto do na ringkot sipanganon i tu dagingna jala marhite na soada sipanganon i ditogu ma Ibana asa unang marpos ni roha tu denggan basa ni Debata.
Didok sibolis i ma : Molo na tutu Ho Anak ni Debata, dokkon ma batu on gabe sipanganon! Sai hira na mangalesengi do hata ni sibolis i: Aha ma lapatanna marhaposan tu Debata, hape so adong silompaon,, sai songon i ma maos paimaimahon asa ditaruhon sipanganon na tabo tu pamanganmi; marlapatan dope haporseaonmi na mandok : na disarihon Jahowa do tongtong ngolum?? Nunga didia Debatami nahinaposanmi?? Sai hira naung singkop dongolui gabe sai dipasombu ho songon i! Mangan jala minum ma ho sian haporseaonmi,, atik na boi do sombu haraparonmi. Tung anak haholongan ma ho tutu da di Amami ! Ama na songon dia ma burju dohot gogoni i hape rapar do ho matematene, boasa dipasombu ho marpogos jala anturaparon?? Tongtong dope ho porsea paboa na anakNa dope ho, jala Ibana gabe ama di ho?? Songon i ma dalan dibahen sibolis i laho manegai parsaoran/haporseaon ni angka naporsea i maradophon Tuhan i. Mansai tangkas do dihilala Jesus pangunjunan i, ai soada sipanganon, hape sai badia jala pita do ngoluNa i marhaporseaon songon i do nang pangoloionNa tu Ama i. Memang sai hira na disarihon sibolis i do sipanganon siapari di Ibana, jala marhite panarihonon ni sibolis i di sipanganonNa naeng segaanna haporseaon ni Jesus i. Nang pe songon i tangkas do alus ni Jesus : "Apala holan sipanganon hangoluan ni jolma; tung nasa hata ni Debata do, na ro sian Ibana!" sai hira na mandok: “Holan tu sipanganon do ahu diarahon bolis, aina dirimpu ho do na holan sipanganon na boi mambahen mangolu ahu??”. Ringkot do sipanganon, jala ndang disangkal Jesus na ringkot sipanganon i, alai ndada holan sipanganon pardagingon i na ringkot, laos ringkot do nang ngolu partondion i pe. Somal do masa pangalaho sisongon on di ngolu ni hita jolma, lumobi ma di tonga tonga ni keluarga na marianakhon, raparon soada sipanganon. Ido umbahen didok Ap. Paulus di 1 Tim. 6: 10 : Ai urat ni nasa hajahaton do roha na holongan di hepeng; i do disangkapi na deba, umbahen na lilu sian haporseaon i, gabe diaithon do godang na bernit tu dirina.) laos alani i on ma ninna torop halak gabe mabiar pajongjong parsaripeon. Alai tangkas do diajarhon Jesus tu hita, halak natinogihon ni Tondi i, molo pe ingkon manaon, ndada na lupa jala dipasombu Debata Ibana, dijungna ro do angka pardisurgo marhobasi di Ibana (ay. 11).
Alani i tangkas ma tapamanat songon dia do Jesus i mangadopi pangunjunan i: batu do diida Ibana na so boi panganon dilehon sibolis i. Alani i do lam tangkas marsihohot Ibana tu hata ni Debata. Hata i do dipangke margogoihon/memberdayakan Ibana, laos hata i do dipangke mangalo sibolis i. Asa halak Kristen na tutu ingkon tangkas do manggolom Hata ni Debata na ulijala na marhuaso i mangatasi saluhut. I dona masa tu si Musa songon na tarsurat di 5 Musa 8: 3 : Ibana tutu paserep roham, Ibana huhut mangaranapi ho, Ibana muse mangalehon ho mangan Manna, na so tinandam hian, manang tinanda ni angka ompum; asa Ibana pabotohon tu ho, ndada holan sagusagu hangoluan ni jolma, mangolu do tahe jolma i sian ganup hata na ruar sian pamangan ni Jahowa). Asa molo hurangan sipanganonpe hita alai tongtong mangolu, lam tangkas ma panandaonta di Debata paboa disarihon do hita so marhite roti/sipanganon, so ganda holan marhite hata ni Debata. Marhite barita ni si Musa dohot Jesus on dapot hita ma sesuatu namansai arga: manang ise na mameop Hata ni Debata jala manghaporseai Hata i dapotna ma pasupasu: molo hurangan ibana di sipanganon,manang otik do na adong, pola malean, pos ma rohanta margogo do hata ni Debata pangoluhon hita, na so tupa mate hita ala ni haraparon i. Ai ndada holan marhite sipanganon, tung marhuaso do Hata ni Debata pasingkophon na ringkot tu pardagingon i. Dung i jaloonta ma muse pasupasu ni Debata hombar tu pangalehonna, songon bangso i na dapotan manna sian surgo i. Molo didok dilehon sipanganon dohot nasa na ringkot marlapatan do i gabe taruli do hita nang di siinumon, parabiton dohot nasa na ringkot (5 Musa 8 : 2-4). Laos joujou do on asa tongtong manghaposi Debata: Rodihon ma angka na mora di hasiangan on, unang ginjang rohanasida, unang dihaposi hamoraon na so mian i; alai dihaposi ma Debata, na buas mangalehon tu hita saluhut sihalashononta (1 Tim. 6: 17; Mat 6: 33-34). Asa molo masape haraparon jala torop jolma marmatean, tung ala ni bala do i manang ala ni angka parporangan, dsb. Boi dohonon ndada sipanganon i na manontuhon, Hata ni Debata do na boi pasingkophon ngolu ni jolma i. Ingkon mangolu do tongtong hata ni Tuhan i jala tongtong togu dibasan hita saleleng ni lelengna. Dung i dijouhon do tu hita asa taboto marpangontik, unang ma marlobilobi, ganup ari do hita dapotan pasupasu jala marlipat ganda (Joh. 6 : 12 : Alai dung bosur nasida, ninna ma mandok angka siseanna: Papungu hamu ma angka ebaeba i, asa unang magopo!), alai laos joujou do on asa olo hita marpanarihon tu angka nahurangan. Asa disarihon Debata do sipanganon i di jolma i, ndada holan Hata i, alai buni do siata pangulaon ni tuhan i laho manguji na porsea i; disuru do jolma i mangula, alai ndada boi pangasahononna gogona manang botohonna. Ndang malua halak na gogo siala hagogoon manang huasona. Asa taringot tu sipanganon boi dohononma: molo adong sipanganon, unang ma pangasahon i; molo so adong sipanganon, unang ma gabe putus asahita; alai pangke ma denggan na adong i, unang ma pangasahon i mangula ulaonmu, molo tung so adongpe, pos ma roham adong dope hangoluanta i ma na sian Hata ni Debata. Haporseaon sisongon i do na boi manjaga hita sian hahisapon dohot sian pangalaho na holan mangholsohon sipanganon, alai asa sintong hita mangolu dibagasan omo ni Tuhan i (1 Kor. 3: 7-9).
II. Rumang ni pangunjunan na paduahon: diajari sibolis do hita asa olo mangunjuni Debata, ditogihon sibolis i ma Ibana tu huta na badia i, dipajongjong ma Ibana tu atas bagas joro i jala didok : “Molo Anak ni Debata Ho, timbungkon ma Dirim tu toru, Dohononna do angka surusuruanna manangannangan Ho, asa unang tartuktuk patmu tu batu!” alai tangkas do alus ni Jesus: Dohot do on didok Surat i: "Ndang jadi unjunanmu Tuhan Debatam!" tangkas do diboto Jesus sangkap ni sibolis i na manogihon Ibana do i tu pangunjunan. Diboan do sibolis i tu inganan na badia i, i ma bagas joro i, dohot do sibolis i mamboan Ibana tu inganan i nang pe halak na so porsea ibana, sai hira halak Kristen do sibolis i alai ndang halak Kristen na tutu, ro do ibana manangihon jamita alai ndang olo porsea, diguruhon do hata ni Debata jala diboto do hata ni Debata, dijahahon ibana do hata ni debata na tarsurat di Psalm 91: 11-12: Ai dohononna do angka surusuruanna taringot tu ho, asa dijaga ho di angka dalanmu sudena. 91:12 Sai * tangantanganonnasida do ho, asa unang * tartuktuk patmu tu batu”. Tangkas do didok “”tung tu halak na mardalan di dalan ni Tuhan i do na ni dok ni Hata i, ndada tu saluhut na masa lumobi ma natu na maralo tu patik i Debata, molo i do pangunjunan do i. Molo pangunjunan na parjolo i taringot gu sipanganon do, alai napaduahon on taringot tu partondion ma muse. Sai dilului jolma do asa sonang tondina, jala na sala i ma molo dipangasahon pingkiran dohot gogona, tu angka halak sisongon i do diboan sibolis i tu atas ni bagas joro i. Alani i boi do angka ruas, sintua, diakones, bibelvrow, guru huria, pandita, ketua seksi, ketua panitia natinogihon ni sibolis ro tu gareja rap marminggu dohot hita. Dijou sibolis i do hita asa olo mangihuthon ibana jala disuru hita turun hape so adong tanggana ujungna gabe manimbung. Porsea do jala marpos ni roha di sude naniulana nang pe so adong haporseaon, so adong jambatan,, dung i gabe ponggolma rungkung na i. Malo do sibolis i mangela jala dipangke do hata ni Debata manghaporseai paboa na ro do angka surusuruan manjaga di angka dalanmu sudena. Memang bekerja dan beriman adalah hal yang sangat menyenangkan Tuhan apalagi kalau itu dilakukan seperti kata firman Tuhan, tetapi alangkah sesatnya kalau firman Tuhan dipahami dari kehendaknya sendiri dan apabila itu dipahami secara sesat sehingga dapat menjadi sangat berbahaya. Alani i ingkon tangkas do guruhononta jala antusanta hata ni Debata asa unang lipe haporseaonta. Unang holan tabo begeon sai hira na sintong, hape gok sipaotooto. Alani i manat hita, torop do ruas, parhalado pargapgap na boi bongot tu parsaoran di huria i. Angka jolma na idaon songon partigor alai halak na so porsea jala parjehe do. Matius 7 : 15: Jaga hamu ma angka panurirang pargapgap, ai na ro do nasida mandapothon hamu marrupahon birubiru, alai anggo rohana di bagasan, tung babiat panoro do! Di bagas joro i do pangunjunan i. Di tingki hurangan, haraparon adong alasan gabe so porsea, gabe tubu holso jala mabiar so mangan, alani i gabe maol hita porsea. Molo di tingki bosur, singkoppe boi do gabe so porsea hita, loja hita mangalului hasonangan dohot jaminan keselamatan gabe dilului dalan, pengen tampil beda, dibahen nasa dalan asa sonang tondina. Molo so dapot na di roha boi do gabe harhar haporseaonta.
III. Rumang ni pangunjunan na III hon. Dipatuduhon ma tu Jesus nasa harajaon ni portibion dohot nasa hasangaponna, lehononna ma i tu Jesus molo olo ibana marsomba tu Jesus i. Huaso dohot hasangapon, jotjot mambahen jolma i gabe sega haporseaonna. Boi do tubu parbolatbolatan di huria, keluarga ni halak Kristen. Mura hita muruk, ndang benget jala ndang marhaporseaon, dung i pangunjunantaringot tu hamoraon gabe madabu jolma i tu lisop ni hahisapon, hasangapon, las ni roha jala nasa na tau pasangaphon. Nunga diunjuni sibolis i hita uju dihasusaan, di nahurangan di masa ni parungkilon, nuaeng diunjuni ma muse marhite hamoraon, hasonangan, hasangapon. Ap. Petrus (1 Pet. 5: 8-10) mandok: Torang ma rohamuna, dungo ma hamu; na maotaot do alomuna, sibolis i, songon babiat na marauang, mangalului sibondutonna. Gomos ma hamu mangalo ibana marhitehite haporseaon; ingot hamu ma: Ndang tarbahen so songgop angka haporsuhon sisongon i, nang tu angka hahaanggimuna na di portibi on. Alai anggo Debata, nampuna saluhut asi ni roha, naung manjou hamu tu hasangaponna na manongtong i di bagasan Kristus, pauliulionna, pahotonna jala patoguonna do hamu, dung jolo ditaon hamu satongkin haporsuhon i. Asa marragam do dalan, metode dipangke sibolis laho manirang hita sian Debata marhite napapeolhon lapatan ni hata ni Debata, asa mapitung jala asa lipe pangantusionta di hata ni Debata. Molo monang siboilis i, talu ma hita jala marjea ma. Di napogos, di na mamora, uju margogo, uju gale, sude gabe sisoada. Ai molo nunga lilu hita, mago ma habengeton molo masa sitaonon, ndang togu be hita hot di Tuhan i molo pe dibagasan hasonangan. Di dua kondisi i sai mangula do pargapgap/sibolis i laho manaluhon hita. Alani i mansai dokdok jala koras do pangunjunan na III hon on, ai disegai do poda haporseaonta, disegai do partondionta. Molo pangunjunan na I dht na II hon di ruhut parduru dope diunjuni, i ma molo mamora, sonang dohot uju hurangan, marpogos jala raparon, molo marlas ni roha, marolopolop jala molo marsak manang humasusa, dsb. Alai nuaeng haporseaonta i ma diunjuni, i ma haporseaon na marojahan di Hata ni Debata, diunjuni do atikna togu manang gale do haporseaonta i. Ai margogo situtu do haporseaonta i molo marurat di di hata ni Debata, tau mangulahon saluhut, songon i dohot manaluhon sibolispe.
IV. Di ujungna didok do: ro ma angka pardisurgo marhobasi di Ibana. Ro do surusuruan i paradehon sipanganon dohot siinumon i di Ibana, dihobasi ma jala diparade nasa na ringkot di Ibana. Dilehon ma sipanganon na ringkot tu pardagingonna songon na nidok ni pangunjuni i, dilehon do hatimboon di Ibana ai gabe nasa tot : Ala ni i do dipatimbo Debata Ibana jala dibasabasahon tu Ibana Goar na sumurung asa nasa goar, asa somba tu Goar ni Jesus nasa ulu ni tot, na di banua ginjang i dohot na di tano, nang na ditoru ni tano, jala asa nasa na marsoara marhatopothon: Jesus Kristus do Tuhan, bahen hasangapon ni Debata Ama! (Fil. 2: 9-11). Alai ndada sian sibolis i dijalo Ibana, tung sian Debata do. Memang malo do sibolis i : 2 Kor : 11: 14 : Ndang pola longang roha disi, ai nang sibolis i, dipasumansuman do ibana songon suruan hatiuron.
Asa gabe apulapul do jamita on tu hita, asa tangkas taboto torop do surusuruan marhobas di hita, uju ro sibolis i naeng mamolgak hita, molo masa paraloan partondion, ndang loason ni Debata hita hurangan, ai suruonNa do surusuruanNa i manghobasi na ringkot di hita. Amen.
oleh : Pdt P Sihombing STh
Posting Komentar